Et descirées nos pelices,
Et enbatues jusq’as lices :
Et hier main devant ma porte
Me jeta-il ma seror morte,
Puis s’enfoï parmi un val ;
Gonbert n’ot pas isnel cheval,
Ne ne te pot à pié ataindre.
Je me voloie de lui plaindre,
Mès je ne truis qui droit m’en face,
Qar il ne crient nule menace
N’autre coroz vaillant deus soles.
Pinte la lasse à ces paroles
Chéi pasmée el pavement,
Et les autres tot ensement.
Por relever les quatre dames
Se leverent de lor eschames
Et Chiens et Leus et autres bestes,
L’eve lor gietent sor les testes.
Qant revienent de pasmoison,
Si conme en escrit le trovon,
Là où li Rois virent séoir
Se laisent à ses piez chaoir ;
Et Chantecler si s’agenoille,
De ses lermes les piez li moille.
Et qant li Rois vit Chantecler,
Pitié li prist du bacheler,
Un soupir a fait de parfont,
Ne s’en tenist por l’or du mont.
Page:Le Roman du Renart, 1826, tome 2.djvu/27
Le texte de cette page a été corrigé et est conforme au fac-similé.
