Que par vos nul mal ne me viegne,
Je sui près que je me contiegne
Vers vos tot à vostre plaisir.
Vos venroiz mès tot à loisir
En nostre meson séjorner,
Jà ne vos en querrai torner
Tant con demorer i vodroiz ;
Un bon recet en toz endroiz
Avez conquis et recovré :
Por ce se j’ai vers vos ovré
Folement et par mal conseil
N’en soiez-vos jà en esveil
Ne en esmai ne en dotance ;
Se Diex me gart de mesestance
Jamès nul jor ne vodrai fere
Chose qui vos doie desplere.
Ne porriez noiant conquerre
S’essiliez ere de la terre,
Ne ma fame ne mi enfant,
Ou se ge ere mis au vent.
Moult par devez ma vie amer,
Que por vostre poez clamer ;
Toz joz mès qanque ge auré
Ert tot à vostre volenté.
Renart dist, par tens veil savoir
Se tu me diz mençoigne ou voir,
Et se tu ne fas mon plesir
Par tens t’en ferai repentir
Page:Le Roman du Renart, 1826, tome 2.djvu/309
Apparence
Le texte de cette page a été corrigé et est conforme au fac-similé.