De tote riens est-il droiture
C’on i esgart sens et mesure,
Rois, or escoute ma parole.
N’a pas esté à bone escole
Ysengrin por jugement fere,
Por ce li venist miex à tere
De faire esgart ne jugement
Dont l’en déist après qu’il ment ;
N’est pas li jugement loiax
Que il a fait, einçois est fax.
Jà hom qui est bien droituriers
Ne jugera autre en derriers ;
D’autre part ne fet pas à croire
Chose qu’il die, c’est la voire,
Et ce poez-vos bien savoir
C’onques ne porent pès avoir
Li vassal nul jor de lor vie,
Einz sont par mal et par envie
Entr’aus et par mortel haïne
Qui longement lor est voisine,
N’onques ne furent bien ensenble.
Por ce vos di et si me samble
Qu’Ysengrin a fet sor Renart
Fol jugement et fol esgart.
Trop est d’aus deus la guerre amere,
Tort a li Leu qui son conpere
Viaut forjugier en tel maniere
Et de la Cort giter arriere.
Page:Le Roman du Renart, 1826, tome 2.djvu/322
Le texte de cette page a été corrigé et est conforme au fac-similé.
