Por son cousin fere venir.
Maintenant ont fet son plesir
Cil à qui il l’ot conmandé.
Ez-vos Grinbert en la ferté
Tot belement pas avant autre,
Son cousin salue et maint autre
Qui estoient avecques lui.
Renart forment le conjoï
Et li fist grant feste et grant joie.
Dist Grinberz, grant talent avoie
De parler à vos une foiz :
Li Rois Nobles est si destroiz
D’un mal qui par le cors le tient,
Dont chascun jor sospire et gient ;
Morir en quide, ce sachiez,
Et il est moult vers vos iriez.
Se le pooiez respasser
S’amor ariez sanz fauser ;
Por ce ving ça tot coiement,
Ne voil estre véuz de gent,
Ne onques nus hom n’en sot mot.
Renart prent à rire à cest mot
Et dist : cousins, or me nomez
Par cele foi que me devez,
Por qu’est li Rois vers moi iriez,
Par qui ai esté enpiriez,
Dites qui m’a mellé vers li.
Vostre conpere, ce vos di,
Page:Le Roman du Renart, 1826, tome 2.djvu/363
Le texte de cette page a été corrigé et est conforme au fac-similé.
