Tant a à aler entendu
Qu’il est au perron descendu.
Qant Renart fu venuz à Cort,
Toz li mondes à lui acort ;
Ainz n’i ot beste si reposte
Qui ne venist jusqu’à la porte
Por Renart seulement gaber.
N’i a nul qui ne l’aut lober ;
Tex i a qui li gietent boe,
Et Renart lor a fet la moe,
Si s’en monte amont en la sale.
Li Rois ot le vis taint et pale,
Car trop ot grant dolor au chief,
Mais moult li torne, à grant meschief
Qant Renart voit léens entrer ;
Et Renart qui bien sot parler
Le salue cortoisement,
Icil Dieu, fait-il, qui ne ment
Et qui fist tot quanque mer serre,
Si gart le meillor Roi de terre !
Ce est mes sires li Lions,
A tesmoinz de toz ces barons,
Cil qui sont tenu à prodome.
Sire, je sui venuz de Rome
Et de Salerne et d’outre mer
Por vostre garison trover.
Li Rois respont sanz atendue,
Renart, moult savez de treslue :
Page:Le Roman du Renart, 1826, tome 2.djvu/369
Le texte de cette page a été corrigé et est conforme au fac-similé.
