Cette page a été validée par deux contributeurs.
52
ROMAN
Vostre baron vilainement,
Mès par loi et par jugement.
Entendez ça, ne vos anuit,
Renart est venuz par conduit
Por droit faire et por amender
Ce c’on li saura demander.
S’est qui de lui face clamor,
Vos li otroiez par amor
A respondre par jugement
En vostre Cort voiant la gent.
Ainz que Grinbert éust finée
Sa reson et bien terminée,
Se dreça en piez Ysengrin
Et li motons sire Belin,
Tybert li Chaz et Rooniax,
Et Dant Tiecelin li Corbiax,
Et Chantecler et Dame Pinte,[1]
Si con el vint à Cort soi quinte,
- ↑ Variante tirée du manuscrit de Cangé :
Et Bruns qui son vis avoit ters,
Et Sire Brichemers li Cers,
Martins li Chevriaus et Bruianz
Li Tors et li Mulez Muianz.
Qant li Conciles fu ensanble
Renart li Rous fremist et tranble ;
Bien set que sa mort est jurée,
Ne puet mès estre destorbée.
Or vodroit estre à Maupertuis,
Si fermeroit moult bien son huis :