La Roïne l’anel li tent,
Renart à grant joie le prent,
Entre ses denz basset a dit,
Certes qui unques ne le vit
L’anel, por voir le conperra,
Jà por nului ne remendra.
Renart mist l’anel en son doi
Et puis a pris congié au Roi :
Le cheval fiert des esperons,
Fuiant s’en va les granz trotons ;
Vers la haie s’est aprochiez
Là où Coart s’estoit muchiez.
Fain a greignor que il ne selt,
De jéuner li chés li delt.
Atant s’en entra en la haie,
Coart le voit, moult s’en esmaie ;
En piez se drece de paor,
Et si li a oré bon jor :
Ce dist Coart, moult par sui liez
Qant vos estes sains et haitiez ;
Forment me poise del anui
Que l’en vos a fet si grant hui.
Renart qui tot le monde boise
Dist : qant de mon anui vos poise
Et que bel ne vos est del nostre,
Diex doint qu’il nos repoist del vostre !
Qant Coart l’ot, moult bien l’entent,
Ne s’aséure de noient
Page:Le Roman du Renart, 1826, tome 2.djvu/73
Le texte de cette page a été corrigé et est conforme au fac-similé.
