Tant s’est penez et traveilliez
Q’as piez lou Roi s’est avanciez,
Si li conte la déablie :
Sire, fet-il, por Dex aïe !
Diex ! fet li Rois, con sui traïz
Et afolez et mal-bailliz
De Renart qui si poi me crient !
Or sai bien q’à mavès me tient :
Seignor, fet-il, or après tuit,
Que ge le voi où il s’enfuit :
Par le cuer bé s’il vos estort,
Vos estes tuit pendu u mort,
Et cil de vos qui le prendra,
Toz ses lignages frans sera.
Qui dont véist Dant Ysengrin
Et le Moton sire Belin,
Et Brun l’Ors et Tybers li Chaz,
Et mon seignor Pelé li Raz,
Et Chantecler et Dame Pinte
Si con el vint à Cort soi quinte,
Et seignor Ferrant le Roncin
Et Dant Roonel le mastin,
Et seignor Blanchart le Chevrel,
Et Dant Tiécelin li Corbel ;
Frobert le siut li Gresillons
Et Petit-porchaz le Fuirons.
Après le sieut sire Baucent
Le Sengler as agues denz :
Page:Le Roman du Renart, 1826, tome 2.djvu/76
Le texte de cette page a été corrigé et est conforme au fac-similé.
