Page:Le Roman du Renart, 1826, tome 2.djvu/91

Que il à li parler ne voise
Privéement et tot sanz noise.
A icest mot se departirent :
Si anemi Renart mar virent,
La hart li ont jà el col mise,
Jà fust moult près de son joïse
Qant Grinbert ses cosins i vient
Et voit Renart qu’Ysengrin tient.
Trere le velt as forces sus,
11710Li autre se sont tret en sus :
Dant Grinbert parla hautement
Oiant trestoz et sagement :
Renart, sanz nule autre devise,
Hui estes venuz à joïse,
Par ci vos en covient passer,
Or vos déussiez confesser
Et fere lez à vos enfanz
Dont vos avez trois biax et janz.
Vos dites bien, ce dist Renart,
11720Bien est droiz qu’il aient lor part :
Mon chastel ert mon fil l’ainz né
Qui jà n’iert pris par home né ;
Mes tors, mes autres forteresces
Lerai ma fame as cortes tresces ;
A mon filz l’autre Percehaie
Lerai l’essart Robert Fressaie
Où il a tant soriz et raz,
Il n’en a tant jusqu’à Arraz ;