Qu’il venoient par grant desroi,
Et chéu sont as piez le Roi.
La Dame s’est tant avancie
Que par devant toz s’est lancie :
Sire, merci de mon seignor
Por amor Dieu le créator !
Ge te donrai tot cest avoir
Se de lui veus merci avoir.
Rois Nobles choisi le tresor
Qu’est devant li d’argent et d’or ;
Del’ avoir fu moult covoitos,
Et dist, Dame, foi que doi vos,
Renart n’a pas vers moi bon plet,
Q’à mes omes a trop meffet
Qu’en ne le vos porroit retrere,
Por ce en doit-on vengance fere ;
Qant de son meffet ne s’amende,
Bien a deservi qu’en le pende :
Ce me dient tuit mi baron
Q’as forces pende le laron,
Et por voir se je ne lor ment,
Par ceus ert livrez à torment.
Sire, por Dieu en cui tu croiz,
Pardone li à ceste foiz.
Li Rois respont, en Dieu amor
Por vos li pardoing à cest tor,
Et dist, par tel vos ert renduz
Qu’au premier mesfait ert penduz.
Page:Le Roman du Renart, 1826, tome 2.djvu/95
Le texte de cette page a été corrigé et est conforme au fac-similé.
