Choflet ai non se només sui,
Mès dites se mangastes hui.
N’aie voir, ce dit Roonel,
De fein m’en tranchent li boiel :
Je mangasse moult volentiers,
Ne mangai deus jors a entiers.
Merveille est, dit Coflet, par Dé ;
Je sai de reisins à plenté
En une vine près de ci,
Manjeroies-en, ce me di ?
Oïl, moult bien, dit Roonel
Mès je me dot moult de la pel.
Tu es coart, ce dit Coflet,
Je ne ti mefferai un pet,
Ice te di por verité.
Alons, dit li Chens, de par Dé.
Atant se metent el chemin
Entre Coflet et le Mastin,
Et sont en une vingne entré
Où un Vilein avoit planté
Un pochon conme trebuchet.
Moult très bien l’i savoit Coflet,
Et dit, si voie-il Noel,
Il fera prendre Roonel
Se il onques puet esploitier.
Lors chemine par un sentier
Bon aléure le troton
Tant qu’il sont venu au pauchon
Page:Le Roman du Renart, 1826, tome 3.djvu/135
Apparence
Le texte de cette page a été corrigé et est conforme au fac-similé.