Renart respont, biaux douz conpere,
Bien ait l’ame de vostre pere !
Jà n’en seroiz par moi desdiz,
Ce est le mieuz, jel’ vos pleviz.
Or pensons donc de tost semer,
J’ai oï les grues chanter
Qui nos tesmoingnent par raison
Que de semer avons saison.
Qui dont véist gens esploitier,
L’un semer et l’autre hercier,
L’autre ces coiches aüner
Et les ramilles fors porter,
Et puis après bien rasteler,
De bones genz li puet menbrer.
Tost fu la chose à droit point mise
Qui de tel gent fust entreprise.
Qant semez fu toz cist essarz
Et bien enclous de toutes parz,
Renart qui moult estoit soutis,
Sus un estoc s’estoit asis,
Dont apele ses conpaignons
Et si fu tele sa raisons.
Seignor, ceste gaaignerie
Ne sera jà à droit partie,
Tuit ensenble la cuellerons
Et ensenble la mengerons
En iver qant il gelera,
Qant viende ne trovera
Page:Le Roman du Renart, 1826, tome 3.djvu/15
Le texte de cette page a été corrigé et est conforme au fac-similé.
