Ausitost con il l’aperçut,
Maintenant cele part corut,
Moult le quida bien detenir ;
Mès qant Droin le vit venir,
Sailletant s’en vet ça et là,
Et li charetiers après va
Corant un levier à son col.
Mès Droin ne fist pas que fol,
Que pas atendre ne le vost.
Li charetiers court quanqu’il pot
Après, que prendre le voloit.
Droïn toz jorz devant coroit
Quanqu’il onques pot voletant,
Et Morout ne vet demorant,
Qui se gisoit lez le boisson.
A la charete de randon
S’en est venuz si con il puet,
Mès ce qu’en haut monter l’estuet
Li anuie moult, ce sachiez,
Que moult estoit mesaiesiez ;
Totes voies est montez sus,
Si a un bacon jeté jus,
Puis descendi de maintenant.
Son bacon en vet traïnant,
A poine et à dolor l’en porte ;
Et Droïns qui si se deporte
Au charetier qu’il fet muser,
S’envole sanz plus demorer,
Page:Le Roman du Renart, 1826, tome 3.djvu/218
Le texte de cette page a été corrigé et est conforme au fac-similé.
