Fet li Rois, de barons de pris :
Cist m’aquiteront mon païs
Vers toz homes par lor puissance.
Vois tante enseigne, tante lance,
Tant blanc haubert et tant escu ;
Cil de là seront tuit veincu.
Moult avons gent, la Deu merci,
Onc mès tant ensemble n’en vi,
Non fist nus hom au mien quidier.
Et cil se prenent à logier,
Es prez qui sont et granz et lons
Tendent tentes et paveillons.
Quant tuit se furent atorné,
Bruns l’Ors est el palès monté
Et li haut baron avec li.
Li Rois moult bel les recueilli
Et lor fet grant joie et grant feste,
Et puis lor a conté son estre.
Segnor, à vos me plaing trestoz
De ces felons paiens estoz
Qui en ma terre sont entrez ;
Mes chastiax et mes fermetez
Prenent par force de lor gent.
Sachiez ne m’est ne bel ne gent
Que vos tant les avez soffert :
Li Camaus malement me sert
Qui nos ameine ses paiens :
Mès nos avons moult crestiens,
Page:Le Roman du Renart, 1826, tome 3.djvu/244
Le texte de cette page a été corrigé et est conforme au fac-similé.
