Mès sor aus en torna le pis,
Car Espinart i fu ocis
Dont li Rois Nobles fu irié
Et tuit li autre corocié.
Desconfit fussent à cel saut
Qant Froberz li Gresillon saut,
O lui de sa gent grant tropé :
Moult par ont ceus mal atrapé,
Plus de vint mile ocis en ont,
Jà mès en lor terre n’iront.
Serpant s’en vont moult esmaiant,
Gresillons les vont enpressant,
Moult les meinent à grant desroi.
Estes-vos l’eschiele le Roi
Que Percehaie conduisoit.
Tantost con li Chamex la voit,
Ses genz apele et dist, segnor,
Ne poons plus garir as lor ;
Or tost, ne vos puis meintenir,
Pensez de vos vies garir.
Adont s’en tornent de randon,
Frobert les suit le Gresillon
Et tuit li autre à grant esploit ;
Et quant li Rois foïr les voit,
Si s’escria : or tost après.
Sire Frobert les suit de près,
Et sa mesnie et tuit li autre,
Li Rois les suit lance sor fautre ;
Page:Le Roman du Renart, 1826, tome 3.djvu/258
Apparence
Le texte de cette page a été corrigé et est conforme au fac-similé.