Renart qui ot son cuer repris
Conme cil qui fu d’ire espris :
Sus se corurent de rechief,
Sor le Roi torna le meschief
Moult grant se ne féust sa gent
Qui le rescovrent bel et gent,
Quar tuit se ferirent entr’eus,
Mès il nel’ tindrent mie à jeus
Ne ne lor en fu mie bel.
Atant esperone Rovel
Le destrier qui tost se remue,
En son poing tint l’espée nue.
Roonel en fiert durement,
La teste jusqu’as denz li fent,
Mort le trebuche de la sele
Et prent le destrier de Castele,
Mener le quide à sauveté
Quant Brichemer l’a encontré
Qui li crie, n’enmenrez mie
Tant conme j’aie el cors la vie.
Rovel entendi Brichemer,
Tantost let le cheval aler
Que il en destre en ramenoit,
Et voit Brichemer qui venoit
L’espée traite contre lui.
Rovel moult bien le recueilli
Et au branc nu bien le requiert.
Moult vertueusement le fiert
Page:Le Roman du Renart, 1826, tome 3.djvu/282
Le texte de cette page a été corrigé et est conforme au fac-similé.
