Renart, va li donques ovrir,
Et se il viaut céenz venir,
Garde que n’i soit destorné,
Qu’il n’i entre à sa volenté.
Maintenant saut Renart en piez
Qui moult en fu joient et liez,
Q’adonc sot-il bien sanz faillance
Qu’auroit de Chantecler vengence.
Lou postiz va desverroillier,
Et Chantecler cuida plaidier,
Voit que la porte estoit overte,
Ne s’aparçut point de sa perte,
Laienz se fiert tout à bandon,
N’atendi per ne conpaignon.
Renart a le postis reclos
Dont primes s’aparçut li cos
Que traïz iert qant Brichemer
Vit à la terre péester ;
Autretel atendi de lui,
Bien set de voir que sanz anui
Ne partira de Cort huimais,
Car il n’auroit trives ne pais
De Renart qu’a ileuc véu
Qui tout le plait li a méu.
De morir a moult grant péur,
Ne Renart n’iert mie aséur
Qui se doute de l’eschaper :
Volentiers li alast doner
Page:Le Roman du Renart, 1826, tome 3.djvu/30
Le texte de cette page a été corrigé et est conforme au fac-similé.
