Tel péor m’a-il ore fete,
Cele longaingne, cele sete,
Une longaingne, une privesse
Fous est qui de lui s’aprivesse.
Un traïtor qui por un oef
Traïroit uit homes ou nuef ;
C’est uns lerres, uns losengiers
Qui en la bene au charetiers
Se fist jeter con beste morte :
La male passion le torte !
Or di ayant, mar es bailliz,
Ne seras mès espenéiz.
Volentiers, sire, dist Renart,
J’estoie ouan en un essart,
Si trovai qatre Huaniax
Bien enpenés et genz et beax,
Delez un grant saus les trovai,
Je m’en repent, je les menjai,
Qui erent filz Hubert l’Escofle,
Un moult religieus hermofle
Qui par cest païs quiert les pès,
Et tuit se font à lui confès
Li malade et li pechéor
Qui de lor pechiez ont péor.
Sire, si les menjai toz qatre,
Dès lors me déust-l’en bien batre,
Mès certes ore m’en repent,
Si en vien à amendement.
Page:Le Roman du Renart, 1826, tome 3.djvu/331
Le texte de cette page a été corrigé et est conforme au fac-similé.
