Page:Le Roman du Renart, 1826, tome 3.djvu/384

La bibliothèque libre.
Le texte de cette page a été corrigé et est conforme au fac-similé.

Que voiz n’aleine n’en issi.
Qant Chantecler le vit ainsi,
Lors conme lierre repris
30060Au bec parmi la keue pris,
En un fossé le traïna.
Or voit bien Renart que il n’a
De nului secors ne aïe,
Car c’est la beste plus haïe
Du monde et de tote gent.
Bien set por or ne por argent,
Por promesse ne por avoir
Ne porroit raençon avoir
Se il estoit aparcéu.
30070Por son savoir a decéu
Chantecler qui por mort le lesse.
Entor lui ot aussi grant presse
Conme se il fust gent develle.
Rohart et Brune la Corneille
Vindrent au Roi tot pié estant
Et li distrent : Sire, à itant
Lessiez Renart, mors iert sanz faille,
Moult li est de ceste bataille
Hui vilainement meschéu ;
30080Or est en ce fossé chéu
Tot mort aussi conme une coche.
Blasme i auriez et reproche
Se l’en metoit plus seur li mein,
Males choses l’aront demein