Ce dist Renart par son gengler,
Bien le poez laissier ester,
Fet soi Renart, ge me jooie ;
Puis dist en bas, s’en ceste voie,
Ne vos faz anui et pesance,
Dont sa-ge poi de nigromance,
Se anchois que nos departons
N’est ramendez cist peliçons,
Jà Dex ne me loist jor por vivre.
Tant ont chevauchié à delivre
Et tant ont entr’eus desputé
Qu’il sont en Blaaingni entré :
Desoz la vile enmi les prez
Si ont lor livres destrossez,
Lor cheval laissierent aler
A l’erbe pestre et saouler,
Si s’en tornent vers le mostier.
Près estoit jà de l’anuitier,
Si s’en erent alez les gens :
Al mostier vienent, s’entrent ens,
Les lampes furent alumées
Et les genz s’en furent alées.
Ce dit Renart, or conmenciez,
Par Deu trop vos estes targiez,
Sans vespres oïr s’en vont tuit.
Sire Renart, ne vos anuit,
Il lor avesprera assez ;
Mès ces chandeles alumez,
Page:Le Roman du Renart, 1826, tome 3.djvu/67
Apparence
Le texte de cette page a été corrigé et est conforme au fac-similé.