Sa renomée et ses boins los
Là où il gist, mime si os
Valent moult mius, ce m’est avis,
C’uns Empereres vilains vis,
Et dont puis qu’il vaut mius tous mors
C’uns vilains à cui sui amors.
Pour sa valour veil par example
Moustrer aucuns une voiz ample,
Que moult doi-on amer signour
Qui prodom est hui en cest jour ;
Voit-on sovent poi amender
De signorage remuer,
Ausi com vos dirai avant,
S’oïr volés icest Roumant.
Un jour ert Renars à repos
A Malpietruis où ert repos
Pour lui deduire et solacier.
Entre ses bras tint sa moillier
Dame Ermengart la siue espeuse
Qui moult estoute et orguilleuse
Estoit enviers la povre gent :
Sire, dist-ele, moult sovent
Ai éu volenté et cure
Que me déisiés l’aventure
Pour coi premiers ne fustes rois ;
Jà savés-vos plus tors et drois
Que ne fait nus hom que jou voie.
Dame, dist-il, se Dius me voie,
Page:Le Roman du Renart, 1826, tome 4.djvu/16
Le texte de cette page a été corrigé et est conforme au fac-similé.
