Sor ta créance et sor ta foi
Que jamais tu, pour nul desroi
Que t’aie fait, ne me grever,
Et tu lasus porras monter
Où sont pieres tant presieuses,
Si plaisans et si deliteuses
Que mius valent c’argens ne ors.
Qui les i mist ? li grans tresors
Otheviens i vi porter.
Qui donc oïst Vilain jurer
De Crois de Dieus, de philateres,
Qu’il fust pendus ausi com lerres
Se il jà jour mais en parloit
A home nul et li dounoit
Ses andoilles de charité.
Renars li dist, en carité
Jà une seule n’en ara,
Car n’avoit gaires que il a
Mangui et bui ; mas monte tos.
Et li Vilains nices et sos
Se descauça et desviesti,
L’arbre ambracha, si n’atendi
Fors tant c’à paines est montés.
Quant au nit vint, si n’a trovés
Fors çou dont li pouchin cuncient :
Lors vint tandis qu’il eslecient,
Et li Vilains rudes et doilles
Regarde aval viers ses andoilles
Page:Le Roman du Renart, 1826, tome 4.djvu/28
Le texte de cette page a été corrigé et est conforme au fac-similé.
