Le texte de cette page a été corrigé et est conforme au fac-similé.
Si que li Rois Nobles arriva à Passe-Orguel ù Renart estoit.
Cascuns sailli qui miex miex huers,
Car hardement lor croist es cuers
Por çou c’à tiere sont hors mer.
Lors fist ses grans trompes souner
Li Rois pour se gent esbaudir,
C’à Passe-Orguel les puet oïr
Renart. Et sitost k’il les ot,
Dist, li Rois vient, au premier mot :
Or tost courez vous tost armer,
Deffendre li voel l’arriver.
Renart ist lors contre le Roi
De Passe-Orguel, par grant desroi
Baniere desploie au vent,
Ki dorée est très ricement
D’un or c’on nomme iniquité.
Apriès Renart sont arrouté
Trestuit li autre et Orgillous
Ki moult estoit fel et estous.
Cius fu moult ricement armés,
Et sour un grant destrier montés ;
Devant tous les autres se mist
Plus lonc que nus ars ne traisist,
