Page:Le Roman du Renart, supplément, 1835.djvu/158

Et qui de grant péril eschape :
Je m’en vois, car n’i puis mais estre ;
Tele est de paradis terrestre
Li costume, quant li uns vient
Et li autres son chemin tient ;
Je m’en irai, tu remanras
Aroec les moisnes as blans dras.
A cest mot en vint contremont
Cius qui engigne tout le mont ;
Joins piés saut sus enmi la place,
Pus s’en reva toute sa trace
Et lait et erre col eslassié
Tant que il vint en plassié.
Or est Renars à garison,
Et Ysengrins est en prison ;
Ou puis se crout dedens la selle
Pensis et tristes à mervelle :
Ne set que faire ne que dire ;
La corde tient et saiche et tire.
Mais por folie se travelle
Que ne li vaut une maaille,
N’i a fors dou bel contenir,
Tout çou li ert à avenir.
La nuis s’en va, li jors repaire,
La lune couche, l’aube esclaire,
Et li moisne sont esvillié,
Atorné et aparillié,
Et vont au puc de l’ewe traire,
Ains qu’il voisent en lor afaire.
Uns moisnes a la corde prise.
Et ou puis a la selle mise,
Et fait la cordelle laschier