Le texte de cette page a été corrigé et est conforme au fac-similé.
Jamais plus gente ie ne tins
Plus dure ne en meilleur point
Beau uiſaige gent corps tetins
Qui ſont ozes en meilleur point
Car tu es daẏmer droit apoint
Lon te tient pour ung chief deupure
Bon eſt loupurier qui mieulx eupure
Tu as aſſez dentendement
Et ſens pour fille de ieune aage
Il nẏ fault point damendement
Ne querir aultre perſonnaige
Tu es nee de bon lignaige
Ainſi comme iaẏ entendu
Bien quon ne congnoiſt eſt perdu
Croẏ de uroẏ ſi ie fuſſe homme
Je te priaſſe pour ma dame
La ſinguliere es en ſomme
Qui oncques fut aimee dame
Car ie te aſſeure ſur mon ame
Que tu es belle tout adroit
Qui a belle dame il a droit
La pucelle
La firent ung poẏ dinterualle
Ses deux ſemblances que ie uẏ
Lune monte lautre deualle
