Clerement diroi de teil beste
Ce qui m’en peut chaer en teste.
Fauvel ne giest mès en estable,
Il a meson plus honorable :
Avoir veult haute menjoere
Et rastelier de grant afere.
Il s’est herbergiés en la sale,
Pour mielx demonstrer son regale ;
Et nepourquant par sa science
Es chambres a grant reverence,
Et es garderobes souvent
Fet il assembler son couvent
Qui si soingneusement le frote
Qu’en lui ne peut remaneir crote.
Fortune, contraire a Raison,
Le fet seignour de sa meson :
En lui essauchier met grant peine,
Quer el palès roial le maine ;
De lui fere honoreir ne cesse.
Entor Fauvel a si grant presse
De gens de toutes nacions
Et de toutes condictions
Que c’est une trop grant merveille :
N’i a nul qui ne s’appareille
De torchier Fauvel doucement.
11 C plus ; BCE en l’estable — 13 Dans A, haute est écrit en interligne — 14 C maniere — 13-14 se lisent ainsi dans E :
Haute mengoere demande,
Rastelier bel et assez viande