duquel les Abyſſins ſe vantent d’eſtre deſcendus. Ie luy dis encore l’ordre qu’on tient ordinairement à la peſche de la ſemonce des perles, qui ſe fait entre Pullo Tiquos, & Pullo Quenim, d’où les Batas en ſouloient anciennement porter quantité à Pazem, & à Pedir, que les Turcs du détroit de la Mecque, & les Nauires de Iudaa prenoient en eſchange des marchandiſes qu’ils apportoient du grand Caire, & des ports de toute l’Arabie heureuſe. I’obmets pluſieurs autres choſes que ie luy racontay, les ayant appriſes du Roy des Batas, & des Marchands de la ville de Panaiu. Ioinct que ie luy baillay par eſcrit l’information que i’auois faite de l’Iſle d’Or, dequoy il m’auoit grandement prié. Ie luy dis comme ceſte Iſle est le long de la riuiere de Calandor, à cinq degrez du coſté du Sud, enuironnée de pluſieurs bancs de ſable, & de grands courants d’eau : qu’au reſte elle peut eſtre eſloignée d’enuiron cent ſoixante lieuës de la poincte de l’Iſle de Samatra ; de tous leſquels rapports Pedro de Faria demeura fort ſatisfait, tant pour le regard de ce que ie luy en diſois, que de la lettre que ie luy auois apportée de la part du Roy des Batas. Auſſi en fit-il la relation tout de meſme au Roy Dom Iouan troiſieſme d’heureuſe memoire, qui l’année d’apres ordonna pour Capitaine à deſcouurir ceſte Iſle d’Or, François d’Almeida, Gentilhomme de ſa maiſon, homme de merite, & grandement capable de ceſte charge ; comme en effet il l’auoit demandée au Roy long temps auparauant, pour recompenſe des ſeruicẽs par luy rendus dans les Iſles de Banda, de Molucques, de Ternate, & de Geilolo. Mais le malheur voulut que ce meſme François d’Almeida eſtant party des Indes pour s’en aller en ce lieu, mourut d’vne fiévre aux Iſles de Nicubar. Dequoy le Roy de Portugal ayant eu des nouuelles certaines, il honora de ceſte charge pour la ſeconde fois vn certain nommé Diago Cabral, natif de l’Iſle de Madere. Neantmoins la Iuſtice la luy oſta depuis, par l’exprés commandement de Martin Alphonſo de Souſa, qui pour lors eſtoit Gouuerneur ; ce qui proceda en partie de ce qu’on diſoit qu’il auoit murmuré contre luy. Il la bailla doncques à Hieroſme Figuereydo, Gentilhomme du Duc de
Page:Les voyages advantureux de Fernand Mendez Pinto.djvu/89
Le texte de cette page a été corrigé et est conforme au fac-similé.
71
de Fernand Mendez Pinto.
