Vraiement, c′est tout le deffaut[1]
Qui en son gentil corps deffaut.[2]
Einsi longuement, sans doubtance,
Pensay, qu′onques je n′os plaisance
A chose qu′où vergier veïsse,[3]
Par quoy mon penser y tenisse ;[4]
Car par pensée remiroie[5]
La grant biauté qui me maistroie,
Le scens, la valeur et le pris
Par qui je sui d′amer espris,
Et le plaisant viaire dous
De ma dame a qui je sui tous.
S′estoit mes cuers certeinnement[6]
Seurpris si amoureusement
De joie, quant penser pooie
Et quant appertement vëoie
Qu′Amours, pour moy plus amender,
Me fait servir et honnourer
Loyaument, sans penser folour,[7]
De toutes les dames la flour,
Que nuls cuers penser ne porroit[8]
La joie que li miens avoit.[9]
Mais quant je pensay ensement[10]
Comment je l′aim très loyaument.
Et elle n′a cure de moy,
Einsois me fait peinne et anoy[11]
Et me fait en dolour languir,[12]
Pour ce que je Faim et désir,
Et qu′elle me deust par droit
Des biens amoureus orendroit[13]