Leur doie, ne doleur ne peinne[1]
Ne que la joie souvereinne
Jamais ne leur deffenderont.[2]
Et quant li villein einsi sont
Vaincu par leur male aventure[3]
Et tourné a desconfiture,
Ces damoiselles devant mi[4]
Viennent et m’ameinnent l’ami,[5]
Et aussi tuit cil damoisel
Qui sont juene, gent et isnel.[6]
Si me viennent trestuit prier
Que la joie vueille ottrier[7]
A l’ami ; et si le tesmoingnent[8]
Pour tel qu’en lui riens ne ressoingnent[9]
Qu’il ne soit secrez et loyaus,
Pleins de tous biens, vuis de tous maus.
Et quant je puis apercevoir
Qu’il est dignes de recevoir
La joie qui est nompareille,
Sachiez que, qui vueille ou ne vueille,
Moult très liement li ottroy[10]
De la joie don et ottroy.
Mais c’est toudis sauve l’onneur[11]
Des dames et sans deshonneur ;
Car a nul fuer n’ottrieroie
Joie a nul amant ne donroie[12]
Dont dame fust deshonnourée ;
Eins vueil que l’onneur soit sauvée[13]
Des dames, quel part que ce soit.
Et s’aucuns autrement faisoit,