Or est einsi que Mors qui tout reçoit
1636 Li a tollu.
S′en a le cuer dolent et irascu,[1]
Car a son temps ot il si grant vertu[2]
Que nul milleur, ne nul plus bel ne fu.
1640 Le chevalier
Sans repentir aimme de cuer entier
La plus belle qui vive, a son cuidier ;
Et elle foy sans muer, ne changier[3]
1644 Li a promis,[4]
Et retenus fu de li comme amis
Et bien amez ; il en estoit tous fis.[5]
Or a la dame en autre son cuer mis
1648 Et li guerpi
Dou tout en tout, et n′a cure de li.[6]
Et a ses yeus voit la belle et celi[7]
Qui les dous biens a qu′il a desservi.
1652 Or vous ay dit
Pour quoy il sont venu oïr mon dit.
Et sans doubte, cuers qui einsi languit[8]
Se destruit moult et a grant doleur vit.[9]
1656 Si m′en devez[10]
Donner conseil au mieus que vous poez ;[11]
Car chascuns est mes drus et mes privez,
Et moult me fi en vous, bien le savez.[12]
1660 Dites, Raison.[13]
Premiers oïr vueil vostre entention ;[14]
Car vous m′avez maint conseil donné bon. »
Raisons, qui fu belle et de bon renom,
1664 Einsi respont :
Page:Machaut - Œuvres, éd. Hœpffner, I.djvu/215
Le texte de cette page a été corrigé et est conforme au fac-similé.
