Humeur, sec, froit et chaut ensamble,[1]
Et pourquoy li quatre element
Furent ordené tellement
Qu’adès se tient en bas la terre,[2]
Et l’iaue près de li se serre,
Li feus se trait haut a toute heure,[3]
Et li airs en moien demeure.[4]
Brief des ouevres celestiennes
Et aussi des choses terriennes[5]
Savoit tant qu’elle estoit experte,[6]
D’engin si vive et si aperte,
Que nuls ne le porroit despondre ;[7]
Car a chascun savoit respondre
De quanqu’on voloit demander,[8]
Si qu’on n’i sceüst qu’amender.[9]
Après Prudence se sëoit
Largesse qui riens ne vëoit,[10]
Einsois donnoit a toutes mains,[11]
A l’un plus et a l’autre meins,
Or, argent, destriers, oisiaus, lerre.[12]
Et quanqu’elle pooit acquerre,[13]
Contez, duchiez et baronnies,
A heritages et a vies.[14]
De tout ce riens ne retenoit,[15]
Fors l’onneur. Ad ce se tenoit :
Noblesse li avoit apris.
Et avec ce, dont mieus la pris,[16]
Elle reprenoit Advarice
Page:Machaut - Œuvres, éd. Hœpffner, I.djvu/276
Apparence
Le texte de cette page a été corrigé et est conforme au fac-similé.