Dont je vous requier orendroit
Sus ce point ci que j’aie droit.»
Adont se leva Attemprance
Qui tenoit par la main Souffrance.[1]
Si parla attempréement
En disant : « Guillaume, comment
Droit pour vous demander osastes ?[2]
Je me merveil que vous pensastes,
Quant vous en fustes si hastis.
Ou vostres scens est trop petis,
Ou outrecuidiers vous demeinne.[3]
Ne savez vous pas bien qui meinne[4]
Le droit, quant parties y tendent[5]
Qui le desirent et attendent ?[6]
Je vueil moult bien que vous sachiez
Que Raisons en est li drois chiez[7]
Et avec li sa compaingnie ;
Chascune y a bonne partie[8]
D’entre nous damoiselles toutes.[9]
De ce ne faites nulles doubtes,
Que drois ne se puet délivrer,
Se toutes ne sont au livrer,
Afin que fait soit bonnement,
Se cils qui fist les drois ne ment.
Je meïsmes y ay office
Pour resister a tout malice,
Qui maintes fois le droit destourne :
Et je d’office le retourne.
Quant uns bons procès vient en fourme,