Lez Raison, et moult bien li[1] siet,
Et Raison aussi en dira
Ce qui[2] bon li en semblera. »
Adont s’est Mesure levée,
En disant : « Ma tresbien amée
Congnoissance, dire ne vueil
Riens qui soit contre vostre vueil,
Eins sui moult trés bien acordans
Ad ce qu’estes ci[3] recordans.
S’en parleray a vostre honneur
Au juge, ce[4] noble signeur,
Qui est courtois et amïables,
Sages, vaillans et honnourables. »
Lors tourna devers li[5] sa chiere
De si amoureuse maniere[6],
Qu’il ne s’en pot tenir de rire.
Et Mesure li prist a dire :
« Biau sire, bien eüreus fustes
Dou conseil que vous esleüstes.
Vous avez tout premierement
A Avis[7] bel[8] commencement,
Qu’on faurroit[9] bien en court roial
D’avoir conseil aussi loial.
Je ne di pas qu’aucune gent
Ne moustrassent[10] bien aussi gent
Conseil et aussi bien baillié
Et d’aussi bel parler taillié.
Mais vëons la condition
D’Avis selonc s’entention :
Il donne conseil franc et quitte