aime plus & deſire que toutes les choſes que Nature porroit ne ſaroit faire ; & ſi ne puet-on ſouvent envoier vers li, c’eſt merveilles que li cuers ne part, ne comment uns cuers amoureus puet ſouffrir ne endurer tele doleur : par eſpecial, quant Deſirs l’alume & eſprent, & le contraint à deſirer ce qu’il ne puet veoir ne avoir. Mais, Douce plaiſance, Douce eſperance, Douce penſée & tres-Dous ſouvenirs le norriſt & ſouſtient. Et, par m’ame, mon tres-dous cuer, ſe ce n’eſtoit voſtre douce ymage qui me fait plus de biens qui toutes les choſes qui ſont en ce monde, riens conforter jamais ne resjoÿr ne me porroit, fors ſeulement morir : car Deſirs me meinne trop dure vie, ne je ne ſuis en lieu n’en place qu’il ne me ſoit tousjours à l’euil & au cuer ; ſi que ſe je vous voloie laiſſier ou oublier, dont Dieus me gart, par m’ame, il ne me lairoit. Si devés eſtre aſſeurée de moy, de mon cuer & de m’amour. Et, par ycelui dieu qui me fiſt, il ne porroit avenir que je vous oubliaſſe, nés que je porroie monter aus nues ſans eſchiele. Et je m’en fie en voſtre bonté. Si, met m’ame, mon cuer, ma vie & quanque j’ay en voſtre ordenance. Et, mon dous cuer, la ſouvereinneté ſe taiſt & unité[1] parole, pour ce que vous dites que voſtre fait eſt li miens, & li miens eſt li vostres. À Dieu, ma tres-douce amour, qui vous doint joie, pais, & paradis, & volenté de moy amer ainſi comme je vous penſe à ſervir.
Si n’atendi pas longuement,
Ains me reſpondi proprement,
De tel metre, & de tele rime
Com li rondeaus que j’ay fait rime.
- ↑ Unite ou unité, c’eſt-à-dire union, égalité de penſées.
