D’eſtre liés, ce que je pooie.
Mais chaſcune avoit un chappel
Floreté d’or, ainſi l’appel,
De roſes doubles & vermeilles, [App. XL.]
Qui bien lor ſéoit à merveilles.
Mais pour ce qu’il en fuſt memoire,
Ainſi alames par la foire,
Où moult de choſes marchandames.
Mais onques riens n’i achetames ;
Car certainement nos penſées
Eſtoient ailleurs ordenées ;
C’eſtoit à ſon pelerinage
Qu’elle voloit d’umble courage
Paier & tres-devotement.
Et je, pour s’amour, vraiement,
Et pour ſa contemplation,
Y avoie devotion.
Si le paiames ſans targier ;
Et puis nous venimes mengier
À une ville qu’on appelle
Par tout à Paris La Chapelle. [App. XLI.]
Mais il y avoit ſi grant nombre
De gent, qu’il n’y avoit pas d’ombre[1]
Qu’on y péuſt bien hebergier
Le corps & le chien d’un bergier.
Nonpourquant nous fuſmes ſi aiſe,
Que, foy que je doy ſaint Nicaiſe,
Il a paſſé plus de ſept ans
Que ne fui ſi bien de ſept tans.
Après mangier, l’oſte paiames ;
Et puis d’ilueques nous levames.
- ↑ C’eſt-à-dire : ombre d’eſpoir.
