Ains que Venus s’en fuſt alée,
Celle chanſon qu’eſt baladée :
Onques ſi bonne journée
Ne fu adjournée,
Com quant je me départi
De ma dame deſirée
À qui j’ay donnée
M’amour, & le cuer de mi.
Car la manne deſcendi
Et Douceur auſſi,
Par quoi m’ame ſaoulée
Fu dou fruit de Dous ottri,
Que Pité cueilli
En ſa face coulourée.
Là fu bien l’onnour gardée
De la renommée
De ſon cointe corps joli ;
Qu’onques villeine penſée
Ne fu engendrée,
Ne née entre moy & li.
Onques ſi bonne journée, &c.
Souffiſance m’enrichi
Et Plaiſance ſi,
Qu’onques créature née
N’ot le cuer ſi aſſevi,
N’à mains de ſouſci,
Ne joie ſi affinée.
Car la déeſſe honnourée
Qui fait l’aſſemblée
D’amours, d’amie & d’ami,
Coppa le chief de s’eſpée
Qui eſt bien temprée,
À Dangier, mon anemi.
Onques ſi bonne journée, &c.
