voſtre ſuer promettés la voie à ſaint Nichaiſe de Reims, pour vous & pour ſes enſans ;[1] & je vous promet par ma foy que je vous iray querre à la porte ſaint Anthoine,[App. XLVIII.] & .T. voſtre frere venra avec moy. Mon tres-dous cuer, vous me faites veillier grant partie des nuis, & eſcrire grant partie des jours ; mais par m’ame, il ne me grieve riens ; ainſois y ay ſi grant plaiſance que je ne puis entendre à autres choſes, & pour amour de Toute-belle que vous devés bien congnoiſtre. À Dieu mon tres-dous cuer & ma tres-douce ſuer & ma tres-chiere dame, qui vous doint pais & ſanté & joie de quanque voſtre cuers aime ! Eſcript le viiie. jour d’aouſt.
Hui ha .i. mois que je me departi
De celle en qui j’ay mis toute ma cure,
Mais onques mais mes las cuers ne ſenti
Nulle dolour à endurer ſi dure
Com fu le departement ;
Car je ne pos dire : « À Dieu vous commant, »
Au departir de ma dame jolie ;
Tant me fiſt mal de li la departie.
Car à peine que mes cuers ne parti,
Tant fu chargiés de dolour & d’ardure,
Quant je perçus que le maintien joli,
Le dous regart & la noble figure,
Et le dous viaire gent
De ma dame laiſſoie ; & vraiement,
En grant paour fui de perdre la vie,
Tant me fiſt mal de li la departie.
- ↑ Ainſi la ſœur étoit mariée & avoit pluſieurs enfans. Ce devoit être une demoiſelle de Conflans[App. XLIX.].
