« Et s’aroies paour & hide,
« Que ſe tu véoies d’Ovide
« Les diverſes mutations
« Faites en maintes regions.
« Joſephus nous dit & raconte,[1]
« Que pour le pechiés & la honte
« De ceus de Sodome & Gomorre,
« Dieus les volt tous confondre en porre.
« Par ſouffre ardant les confondi,
« Et la terre environ fondi ;
« N’onques n’en pot eſchaper ame,
« Fors Loth, ſes enfans & ſa femme.
« Car Dieus, qui tout fiſt & fourma,
« À trois angles donné fourme ha
« Tele qu’il ſembloient homme eſtre.
« Sages eſt qui ſert ſi bon meſtre :
« Et les envoia à Abram,
« Qui puis fu nommés Abraham :
« Cils les reçut deſſous le chaiſne
« Où il habitoit, car de fraiſhe
« N’avoit ne maiſon ne palais,
« Ne de pierre, ne biaus ne lais.
« Les .iii. angles de li partirent,
« Et Loth hors de Sodome mirent,
« Aveuc ſa femme & ſes enfans,
« Qui d’aler ne furent pas lens.
« Mais li angle leur deffendirent,
« Et de par Dieu moult bien leur dirent
- ↑ De Antiquitatibus Judæor., lib. I, c. xviii. Machaut cite ici Joſèphe de préférence à la Bible, pour me pas être accuſé d’accorder la même autorité aux livres ſaints & aux Métamorphoſes d’Ovide.
