Qui eſt parfaite ſans deffaut
De quanque à Bonne & belle faut.
Si me ſemble qu’en ſa reſponſe
N’a pointure, eſpine ne ronſe,
Ne choſe qui face à blaſmer.
Ainz eſt tout dous, ſanz riens d’amer.
Dont moult voulentiers la véoie,
Et au lire me delitoie,
Pour ce qu’entre piez avoit mis
Les plus grans de mes annemis,[1]
Si qu’il ne feront jamais grongne
De bien que ma dame me dongne.
Car je les reſſongnoie fort
Pour ce qu’il eſtoient trop fort
Et trop puiſſant encontre my,
Dont j’ay pluſieurs fois dit : aimy !
Maiz Deſir qui ſanz dormir veille,
N’en mon cuer onques ne ſommeille,
Me vint dire & ramentevoir
Que je ne faiſoie pas devoir,
Et qu’il ne me lairoit durer
Ains me feroit tant endurer
Que ſouſtenir ne le pourroie,
Se tour ne voie ne queroie
Comment ma douce amour véiſſe ;
Car il me tenoit trop pour niſſe,
Si qu’en moy toudis acroiſſoit,
Et Amours pas ne deſcroiſſoit ;
Qu’Amour & Deſir, ce me ſemble,
D’une laiſſe courent enſemble :
Et quant li deſirs amenrit,
- ↑ Danger & Malebouche.
