Galerite ne pouuant plus du tout mettre en doute qu’il ne fuſt ſon Fils, apres toutes les particularitez qu’il diſoit à Sextilie, ſe mit à luy dire les choſes du monde les plus tendres & les plus triſtes : car elle ne pouuoit luy parler de luy, qu’elle ne luy parlaſt auſſi de Porſenna. De ſorte que Mezence s’en irritant, apella le Capitaine de ſes Gardes, pour luy commander de remener Galerite au Chaſteau où il l’auoit eſté prendre : & de mener en ſuite Aronce en lieu où il pûſt reſpondre de luy. Mais comme les choſes en eſtoient là, on entendit vn grand bruit dans la Cour du Palais : vn moment apres on l’entendit dans l’Eſcalier, & dans l’Antichambre : & vn inſtant en ſuite, ce Capitaine des Gardes que Mezence auoit apellé, entra dans ſon Cabinet : & paroiſſant aſſez eſtonné : Seigneur, luy dit-il, voicy le Roy de Cluſium, à la Teſte de tout ce qu’il
