ſeulement parmy les Veſtales, celle que l’on apelle la Grande Veſtale, mais que d’eſtre ce que ie ſuis, ie ne ſçay, dis-ie, ſi ie ne dirois point que i’aimerois mieux eſtre le Soldat que la Princeſſe tant ie ſuis peu ſatiſfaite de mon ſexe. Quoy Madame, reprit le Prince d’Ameriole, vous pourriez renoncer à la beauté, & à l’Empire qu’elle donne à voſtre ſexe ſur le cœur de tous les hommes, & vous reſoudre d’eſtre vn ſimple Soldat, pluſtoſt que d’eſtre vne grande Princeſſe ? ouy, repliqua-t’elle bruſquement ; & ie ſuis quelqueſfois ſi honteuſe d’eſtre née Eſclaue, que ſi ie portois des Fers qui ſe puſſent rompre, il y auroit longtemps qu’ils ſeroient rompus. Ha ma ſœur, luy repliqua la Princeſſe, vous ne ſongez ſans doute pas à ce que vous dittes : car enfin il me ſemble que noſtre ſexe a mille auantages ſur