vne Ville où ſon Riual eſtoit auſſi : mais ils eſpererent que s’allant offrir aux Aſſiegez pour les deffendre, ils en ſeroient protegez : & qu’ainſi n’ayant rien à craindre qu’Horace, Horace ſeroit auſſi expoſé qu’Aronce, puis qu’Aronce n’eſtoit pas moins vaillant que luy. De ſorte que ſe ſeparant alors, Amilcar, Artemidore, & Zenocrate, prirent le chemin du Camp, où ils pretendoient trouuer Tarquin : & Aronce, Herminius, & Celere, en prirent vn deſtourné, que leur Guide leur enſeigna : afin de demeurer cachez dans vn Bois qui n’eſtoit pas trop loin d’Ardée, iuſques à l’entrée de la nuit : croyant qu’il leur ſeroit plus aiſé de ſe ietter dans la Ville à cette heure là qu’en plein iour ; & en effet ils y furent, & s’y tinrent, auec intention d’y eſtre iuſques à ce que le Soleil fuſt couché. Mais enfin l’heure eſtant venuë, où
