les autres Dames au lieu où elles deuoient eſtre, il n’oſa les y ſuiure, de peur d’irriter Tarquin qui eſtoit ialoux de ſon authorité, iuſques aux plus petites choſes. Cependant Aronce & Celere ſe mirent à ſe promener dans vne Place qui eſtoit deuant le Palais du Roy, afin d’attendre Artemidore, Amilcar, & Zenocrate, iugeant bien qu’ils ſortiroient dans peu de temps. Mais en les attendant, que ne dit point le malheureux Aronce ; eh de grace, diſoit-il à Celere, aduoüez du moins pour me conſoler, que ie ſuis le plus malheureux homme du Monde. En effet conſiderez ie vous prie quelle est l’opiniaſtreté de ma mauuaiſe fortune, & en quel danger eſt Clelie. Encore ſi elle eſtoit moins belle, on pourroit eſperer qu’elle ne ſeroit point connuë : mais ayant la beauté qu’elle a, le moyen qu’on ne deſcouure point
