quoy ſi vous m’en croyez, ou n’aimez point Cyneſie, ou aimez la tout de bon. I’y ſuis reſolu, reprit Artaxandre, quand ce ne ſeroit que pour me vanger de Paſithée, qui ſe conſole ſi aiſément de ma perte, s’il eſt vray qu’elle ait donné le Portrait que ie viens de voir, comme il y a grande apparence. Mais pendant qu’Artaxandre & Philionte s’entretenoient de cette ſorte, la belle Cyneſie dormoit paiſiblement : & par ce paiſible ſommeil, on peut dire qu’elle preparoit de nouuelles armes pour acheuer de vaincre Artaxandre : car elle s’en efueilla le teint plus repoſé, & les yeux plus brillans. Mais en s’eſueillant, elle fut fort ſurpriſe de voir qu’au lieu d’vne Boiſte de Portrait garnie d’Eſmeraudes, qu’elle penſoit auoir encore au bras, elle y en auoit vne couuerte de Diamans, qui eſtoit incomparablement plus riche que la ſienne.
