vous dire. Et en effet Brutus entra iuſtement comme Herminius parloit ainſi : mais ce fut d’une maniere qui commença de ſurprendre Amilcar : car ſçachant qu’il n’y auoit alors perſonne dans cette Chambre, qu’Aronce, Herminius & luy, il ne ſuſpendit pas l’uſage de ſa raiſon comme il auoit accouſtumé, & il entra auec vne liberté qu’Amilcar ne luy auoit iamais veuë. Mais à peine fut-il entré, qu’allant droit à cét agreable Afriquain ; puis qu’apres auoir trompé le deffiant Tarquin & la ſoupçonneuſe Tullie, luy dit-il, ie n’ay pû tromper l’adroit Amilcar, il vaut autant me montrer à luy pour ce que ie ſuis, afin que m’ayant quelque obligation de ma confiance, il m’aide apres à garder vn ſecret où peut-eſtre le ſalut de Rome eſt auſſi fortement attaché que le mien. Quoy, le Brutus que ie voy, s’eſcria Amil-
