uoir vne, adiouſta Amilcar, ie vous offre toutes les miennes pour ſçauoir la voſtre : car il eſt certain que ie n’ay iamais eu de curioſité ſi forte. Comme il y va de mon honneur de la ſatiſfaire, reprit Brutus, ie veux bien vous promettre de vous faire ſçauoir toute ma vie : mais ſi ce n’eſt pas par moy meſme il faut que ce ſoit ou par la bouche d’Herminius, qui ſçait toutes mes auantures, & toutes mes penſées, ou par celle d’une de ſes Amies, qui a eu beaucoup de part au ſecret de mon ame. Ce ſera pourtant à condition, adiouſta-t-il, que ie ne ſeray pas preſent à cette narration, car ie ne me ſens pas l’ame aſſez ferme pour me reſoudre à eſcouter le recit de mon bonheur paſſé, en vn temps où ie ne puis plus iamais pretendre d’autre plaiſir que celuy de la vangeance, & de pouruoir deliurer ma Patrie de la ſeruitude où
