fuſé ſa fille, qu’il vouloit donner à vn autre de la meſme nation. Tarquin voyant que cét homme ſeroit vn obſtacle inuincible à tout ce qu’il voudroit entreprendre s’il ne le perdoit, & qu’il ſeroit meſme dangereux de ſonger à le perdre ouuertement, ſe reſolut à le perdre par vne trahiſon. Sçachant donc que Iunius eſtoit vn homme dont la probité eſtoit connuë de tout le ſenat, il luy dit qu’il eſtoit aſſuré qu’Herdonius auoit fait vne coniuration contre luy, & contre tous les Senateurs, afin de ſoumettre les Romains aux Latins, & de ſe rendre Maiſtre de l’un & l’autre Peuple : Mais que ne pouuant prouuer cette verité contre Herdonius, il auoit beſoin qu’un homme d’authorité tel que luy ſouſtinſt cette accuſation par ſon teſmoignage quand on l’auroit commencée. A peine eut-il fait cette pro-
