il s’eſtoit enfin rendu ſi redoutable qu’à peine oſoit-t-on penſer quelque choſe contre luy. Il n’y auoit pas vn veritable Romain qui n’euſt voulu le pouuoir perdre, mais il n’y en auoit pourtant pas vn qui euſt alors aſſez de hardieſſe pour l’entreprendre. De ſorte qu’on pouuoit dire que Rome auoit touiours vn nombre infiny d’hommes qui eſtoient propres à faire des Coniurateurs, ſans qu’il y euſt iamais aucune Coniuration, tant le ſuperbe Tarquin & la fiere Tullie s’eſtoient rendus redoutables. Ainſi tout ce que pouuoit faire Aronce eſtoit de ſe pleindre, & de taſcher à trouuer les voyes de donner de ſes nouuelles à Clelie, afin de voir s’il n’y auroit point moyen de l’enleuer. Mais cela ne ſe pouuoit pas meſme faire aiſément : car il falloit qu’il fuſt touſiours caché s’il ne vouloit eſtre pris : Siue-
