ſi effectiuement les choſes euſſent deſia eſté en ces termes là, & ſuiuant la couſtume de ceux aui ont vne violente paſſion dans l’ame ; il raiſonna ſur des euenemens qui vray ſemblablement ne deuoient iamais arriuer. Il fit cent obiections inutiles, il propoſa meſme des expediens preſque impoſſibles, quoy qu’il les connuſt pour tels, & il s’entretint ſi longtemps auec Amilcar, que la ſage Racilia leur enuoya dire qu’il eſtoit à propos qu’il ſe retiraſt, de peur que s’il retournoit trop tard au lieu où il logeoit, on ne le ſoupçonnaſt de tramer quelque choſe dans Rome, & qu’on ne vinſt à deſcouurir la verité : de ſorte que ces deux Amis furent contraints de ſe ſeparer. Mon cher Amilcar, luy dit Aronce en l’embraſſant, que ie vous trouue heureux de n’auoir point d’amour, & que ie ſuis miſerable de ne pouuoir ſeulement ſou-
