diſpoſition amoureuſe, ſans me cauſer ny grande douleur, ny grande ioye, ne laiſſe pas de me faire reſuer doucement. Ie fais meſme des vers d’amour plus facilement en cét eſtat, que quand i’ay l’ame poſſedée de quelque violente paſſion, & ie reſue preſque auſſi agreablement quand ie ſuis en cette humeur, que ſi i’auois pour obiet de ma reſuerie toutes les douceurs que l’eſperance donne aux plus heureux Amans. Ha ! Mon cher Amilcar, s’eſcria Aronce, vous aimez plus l’amour en general que vous n’aimez vos maiſtreſſes en particulier : & ſi i’eſtois de voſtre humeur ie ſerois bien moins miſerable que ie ne ſuis. Comme ils en eſtoient là ils entendirent quelque bruit dans l’Eſcalier, de ſorte qu’ayant demandé ce que c’eſtoit, ils ſceurent que c’eſtoit Brutus qui rentroit chez ſa Tante : ſi bien qu’Amilcar pour le
